السلام عليكم ورحمة الله وبركاته
الى من يهمه الأمر
الموضوع : كسب صديق خيرٌ من إعطاء مخالفه
سيدي
انا المواطن الغني والهامور وبو عندي بورش وفيراري وستارلايت وكورولا ، وكمين قطعة ارض في القرم والعذيبه .. اتقدم اليكم بهذي الرساله المطبوعه بجهاز الكمبيوتر اللي يعتبر واحد من 15 جهاز املكه هذا غير اني مشتري تلفزيون 42 بوصه وبلاي ستيشن بالاقساط وعلى طاري البلاي ستيشن تراه شريط كرة القدم وحده بـ 30 ريال وما يجي مع اللعبه .. وانته تعرف اهمية اللعبه للترفيه عن النفس بعد يوم شاق من العمل .. العمل اللي رغم التعب اللي فيه .. انا احبه واجد واجد خصوصا يوم استلم راتبي اللي يوصل للـ2000 ريال .. واللي ينخصم منه مبلغ 300 ريال للسلفيه من البنك ... عشان القصر اللي مسونه على ضفاف نهر وادي عدي ... اتقدم لكم بهذه الرساله واقول فيها :
تراه رجالكم يا سيدي ورمولي فوادي نعم .. اكون ماشي في الشارع وما لابس حزام والشارع زحمه ... والسيد واقف ... ويجيني الشرطي ويأشرلي البس الحزام ... تو انا فتحت الدريشه ... قلتله تعال خالفني ... قالي ابدا كيه ما ترضى نته ... ما تعرف انه "كسب صديق خير من اعطاء مخالفه" بعدني انا اقول في فوادي .. اعركهن عيوني وا ما اعركهن عشان اصدق .. بيكون ذا الشرطي مايته عليه ناقته اليوم والا شي ... واستجن
انزين قلنا ما عليه ... ذاك اليوم اتمشى في شارع الحب ومشغل الكشافات ... وتوقفني الدوريه وينزل الشرطي ويخابرني وياخذ لي علومي واخباري ويعزمني على قهوه في ستار بوكس وبعدين يقولي لو سمحت اخوي العزيز الغالي العديم .. عن تشغل كشافات مره ثانيه .. انزين ؟! قلتله ان شاء الله .. كيف تو ما اتخالفني ؟! قالي لا " كسب صديق خير من اعطاء مخالفه" وانا الحين كسبتك كصديق واكيد كلامي ما راح تنساه وما راح تشغل كشافات سياراتك مره ثانيه ... وانا بعدني مستفكر واقول هي والله
قلنا ما عليه امشي في الشارع وسيارتي فيها مخفي ... ويجي الشرطي يعطيني شاكليت بو بقره بمناسبة اسبوع المرور ويقولي .. اخوي ارجوك ارجوك الشيمه لا تسوي مخفي مره ثانيه وسير اقرب مكان وقلعه ... وانا اقوله ان شاء الله بس عندي سؤال .. ما تخالفني ؟!! .... قالي لا " كسب صديق خير من اعطاء مخالفه"
اها ورمولي فوادي رجالك يا سيدي .... نحن ما ضارين كذاك ... نحن من خلقنا ما سمعنابه ذا بو الصديق والكسب والخير ... نحن من عرفنا الدنيا ... نعرف انك تمشي في الشارع ما تسمع الا ويو ويو والا فول ليت ... ويوم توقف.. جيب الليسن والملكيه.. وحالموه تسوي كذاك!! ... وتجلس انته تتبقبق وتفسر وتذكر الاعذار... واخر شي يعطوك مخالفه ... وعاد تراه هو السؤال لما يسألك ليش انته سويت كذاك .. بس عشان يمشي الوقت ... والا سلامتك الشرطي ما مترجي منك اجابه معينه يعني ولا اعتقد انه سمع او فهم شي من تبقبيقتك
لكن انا بو كاضلي فوادي تو هذي مال كسب صديق خير من اعطاء مخالفه ... ما عاجبتني البر ... كيه حتى ما زاهي عليهم يقولوها ... ما موالم البر .... ما موالم انه الشرطي يكشخ لك او يبتسم .. ما موالم البر انه الشرطي يناقشك .... غير عن كذاك نحن ما نفهمها ود الحلال ذي الهرجه .. ما ضاريين عليها ... نحن ضارين نسمع .. اذا ما عاجبنك سير المركز اشتكي ... نحن ضارين نسمع انته ما تحترم القوانين .. نحن ضارين نسمع جيب الليسن والملكيه .. نحن ضارين نسمع اتبعنا مركز الشرطه .. اما ذي بو صديق وخير وكسب .. جديده علينا .. غير عن كذا يا سيدي نحن شعب عندنا فلوس واجد وما نعرف هين نوديهن ومن كثرهن قمنا حتى نمش بهن المخاط الله يعزك ... فأذا جلسولنا كسب صديق وكسب صديق وما يعطونا مخالفات فلوسنا هين انوديهن ما احسن ندفعهن حال المخالفات بدل لا نشتريبهن جونية عيش ... تراه مبونه العيش مضر بالصحه
اسألك سيدي بالله الواحد الاحد ... غيروها ذي بو كسب صديق.. خوزوها ما نبغاها لانها ملغه .. بغيت ابلعها ... نشبتلي نعم .. يجيني حر واتنافض يوم اسمعها ... اختارو لكم وحده ثانيه يوم ماشي بد عن الشعارات ... لكن ذي ما حلوه البر البر
تصدقوا بالله انه هذي العباره يعلموها للشرطي خلال فترة تدريبه قبل التحاقه بالعمل في الجهاز
حد منكم جاله قاله شرطي ... " كسب صديق خيرٌ من إعطاء مخالفه
03-09-2010, 04:52 PM
كسب صديق خير من إعطاء مخالفة**الشيمة ادخل واضحك كان تروم**هههههههه
العرض العادي
